An thurel tamtak zinga Zonet Lunglei tarlan dan chuan, Congress leh MNF tih thin dan anga Lunglei aiawh Board member dah tura an ngenna tih hlawhtlin a ni lo chu an hotute laka an vui thu leh an party rorel dan mak an tih thu C. Lalhmingliana ZPM Southern Hqrs, Lunglei President chuan a sawi, niin July 27, 2024 a Zonet Lunglei chanchinthar chuan a tarlang.

C. Lalhmingliana hian ZPM constitution rorelna, Republic Hall Aizawla neih ah thusawiin, ZPM Party rorel dana Lunglei leh chhim mipuite lungawilohna hrang hrang a sawi a. MNF leh Congress te'n an lo tih thin dan angin, April thla tawp lam khan Board hrang hrang member ah Lunglei aiawh dah tura minister hrang hrang hnena ngenna lehkha an thehluh thu a sawi.

Chu an ngenna chu, vawiin thlenga tih hlawhtlin a la nihloh thu leh minister pakhat chuan an dil ni miah lova Lunglei aiawh tur Board member pakhat a dah thu a sawi a, chuzawng chu ZPM Southern Hqrs atanga Lunglei aiawh a nih tak thu leh an hotute rorel dan mak an tiin an vui thu a sawi a ni.

Lungleia NGO leh mimal ten hetiang khawpa kan thlawp lai che u in, a hnungtawlh zawng hlirin in kal tia, an cha chhuah thin thu a sawi bawk.

Lunglei Municipal Council  inthlan ah seat awm zawng zawng la a, hneh taka an sorkar avangin hemi boruak hian ZPM party  thli chu Mizoram pumah a tleh tir niin C. Lalhmingliana chuan a sawi a. Tuna ZPM sorkar lo piangah tha thawh hlawk hle-a an in hriat thu leh duhsak phua an in hriat thu sawiin, Lunglei mipuite'n ZPM chu sorkar kal tawhte aia Lunglei ngaihsak tura an beisei thu a sawi a, campaign laia an au hla decentralisation of powers chuan chhim lamah thleng ve ngei se an duh thu a sawi bawk.

ZPM Southern Hqrs President chuan, Congress party khan an sorkar laiin Lunglei an dah pawimawh hle niin a sawi a, Lunglei atangin cabinet minister pahnih leh parliamentary secretary an awm thu a sawi a. Kum 2018 a MNF a sorkar pawh khan Lungei atangin cabinet minister pahnih bakah Mizoram Youth Commission (MYC) chairman leh Bamboo vice chairman an awm thu a sawi.

Sorkar kaltawh te'n an lo enkawl thin dan rilru pu hian, an sorkar phat khan minister pahnih nei turah an in ngaih thu sawiin, Lunglei atanga minister pahnih an awm takloh hnu ah ZIDCO chairman leh KVI chairman, a eng emaw zawk zawk  leh MYC chairman an beisei leh thu ZPM Southern Hqrs President chuan a sawi a, a harsat thu an hotute sawi chu an pawm thu sawiin, a vuivai zawnga la deuh an awm pawhin vui lova hotute rorela lungawi turin an in ngen thu a sawi bawk, niin Zonet Lunglei chanchinthar chuan a tarlang a ni.